Að taka við hörmulegu búi verður ekkert grín

Hvernig í ósköpunum stendur á því að fleiri Íslendingar látast hlutfallslega ár eftir ár en landsmenn annarra Evrópuþjóða? Embætti landlæknis hefur birt tölur yfir látna á síðasta ári. Fjölgaði látnum um 1,5% frá árinu 2023. Það er árinu þar sem Ísland reyndist með hæstu dánartíðni Evrópuþjóða miðað við meðaltal áranna 2017 til 2019 fyrir Covid-19. Tölur landlæknis staðfesta að þriðja árið í röð er Ísland með hvað hæsta hlutfall látinna í Evrópu. Nýjum landlækni er óskað velfarnaðar í störfum sínum. Ekki veitir henni af heillaóskum því hún tekur við vægast sagt hörmulegu búi fráfarandi landlæknis og núverandi heilbrigðisráðherra. Grunnforsenda þess að nýr landlæknir verði farsæll í starfi er að bera gæfu til að víkja hagsmunum hluthafa lyfjaframleiðenda til hliðar og setja heilsufar landsmanna í forgang. Með þeim eina hætti breyttra áherslna geta landsmenn átt von á að skelfileg staða Íslands meðal þeirra þjóða sem flest hafa umframdauðsföllin taki breytingum.

Snúningshurðin

Að hátt settir starfsmenn opinberra lyfjaeftirlitsaðila geti gengið að vel launuðum stjórnunarstörfum hjá lyfjaframleiðendum vísum, svo framarlega sem þeir „stuðli með ákvörðunum sínum“ hjá eftirlitsaðilanum að jákvæðri meðferð umsókna um markaðsleyfi lyfjum til handa, skapar mikla hættu á ákvörðunum þar sem heilsufarslegir hagsmunir almennings víkja fyrir fjárhagslegum hagsmunum hluthafa lyfjaframleiðenda. Viðhengd frásögn um starfsskipti byrjar ekki að lýsa þessu ólánsfyrirkomulagi – en afleiðingarnar leyna sér því miður ekki.

Verður viðtalið við Mel Gibson þúfan sem veltir hlassinu?

Frumvörp um að heimila sölu Ivermectin án lyfseðils (over the counter) eru nú til meðferðar í átta ríkjum USA. Sala Ivermectin án lyfseðils er þegar heimil í Tennessee. Ivermectin var sem kunnugt er sett út af sakramentinu af heilbrigðisyfirvöldum beggja vegna atlantsála af hagsmunagæslu fyrir lyfjaframleiðendur sem ella hefðu ekki fengið samþykkt neyðarleyfi Covid-19 bóluefnunum til handa þar sem grunnforsenda neyðarleyfisveitingar af hálfu lyfjaeftirlitsaðila er að ekki sé til staðar lyf sem gæti komið í stað bóluefnisins. Niðurstöður hundraða rannsókna staðfesta lækningamátt Ivermectin á Covid-19. Vaxandi athygli vekur virkni á krabbamein en ánægjulegar fréttir af bata krabbameinssjúklinga sem þegið hafa lyfjakokteil sem inniheldur Ivermectin berast af vaxandi tíðni. Nýlegt viðtal Mel Gibson í þætti Joe Rogan þar sem hann greindi frá hvernig Ivermectin hefði læknað þrjá vini sína sem þjáðust af krabbameini hefur að vonum vakið mikla athygli.

Í skýrslu sérfræðingahóps forsætisráðherra Alberta fylkis í Kanada er sérstaklega fjallað um Ivermectin en fljótlega kom í ljós að lyfið dró úr þörf fyrir innlagnir og fækkaði dauðsföllum á tímum Covid. Hversu mörgum mannslífum hefði mátt bjarga hér á landi með notkun lyfsins verður aldrei vitað en á heimasíðu Lyfjastofnunar er umfjöllun frá mars 2021 þar sem greint er frá afstöðu Lyfjastofnunar Evrópu sem mælir gegn notkun Ivermectin til varnar og meðferðar á Covid-19. Ritrýndar rannsóknarniðurstöður vísindamanna sem eiga það sammerkt að sýna fram á gagnsemi lyfsins sem meðferð við Covid-19 og birst hafa á síðustu þremur árum hafa ekki náð að breyta neikvæðu viðhorfi íslenskra heilbrigðisyfirvalda til Ivermectin. Hvers vegna íslensk heilbrigðisyfirvöld setja hagsmuni lyfjaframleiðenda framar heilsufari landsmanna heldur áfram að vera ráðgáta. Vera kann að fleirum en mér þyki í meira lagi furðulegt að lyf sem sannanlega hefði bjargað tugum mannslífa á covid tímum og líklegt er til að geta gagnast einhverjum þeirra mörgu sem greinast nú með illvíg krabbamein í kjölfar mRNA bólusetningar skuli enn vera litið hornaugu af heilbrigðisyfirvöldum. Það er eitthvað mikið að hér á landi. Og völundarsmiður þessa ófremdarástands hefur verið gerð að heilbrigðisráðherra. Eins og þrautreyndur blaðamaður til áratuga segir gjarnan þegar honum blöskrar. Þetta er ekki hægt að skálda.

RFK Jr. tekinn til starfa

Nýr heilbrigðisráðherra Bandarikjanna, Robert F. Kennedy Jr., ávarpaði starfsmenn ráðuneytisins á fyrsta starfsdegi. Sagði hann tölur sýna að landsmenn væru þjakaðir sem aldrei fyrr af krónískum sjúkdómum eins og t.d. offitu, fíkn, krabbameini, ófrjósemi og þunglyndi og í meira mæli en þekktist meðal annarra þjóða. Ljóst væri öllum að eitthvað mikið hefði farið úrskeiðis. Hvers vegna svona væri komið sagði hann hvorki sig né aðra vita nákvæmlega. Verkefnið væri að finna ástæðuna og ráða á þessu bót. Meðal fyrstu verka ráðherrans var að láta afboða löngu dagsettan fund ráðgjafarráðs Sóttvarnastofnunarinnar CDC um bólusetningar en ráðherrann hefur gagnrýnt störf ráðsins sem handgengið er lyfjaframleiðendum og ekki óháð í ráðgjöf sinni. Jafnframt var eitt af hans fyrstu verkum að gefa fyrirmæli um breytta tilhögun kynninga til almennings á bólusetningum i þá veru að hætta áróðri og leggja áherslu á upplýst samþykki með fræðslu um kosti og áhættu bóluefnanna. Ef marka má frétt Daily Mail eru læknar og heilbrigðisstarfsfólk felmtri slegið af tilhugsuninni um að þurfa nú að upplýsa foreldra um hættuna á skaðlegum aukaverkunum bóluefnanna á börnin.

Hvenær tekur Ruv Ragnar Reykás á mRNA efnin?

Að fylgjast með meginstraumsmiðli taka eldsnöggan ritstjórnarlegan viðsnúning gagnvart málefni er áhugavert. Lesendur miðilsins DailyMail Online eiga fullt í fangi með að átta sig á hvernig því víkur við að Covid-19 mRNA bóluefnin eru skyndilega orðin skaðleg. Miðillinn flytur nú lesendum fréttir dag eftir dag af skaðsemi efnanna og vísar til niðurstaðna ritrýndra rannsókna. Ekki lætur miðillinn þar við sitja heldur er hann farinn að greina frá niðurstöðum rannsókna um skaðsemi efnanna sem ekki hafa enn verið birtar, sbr. hlekkjuð frétt. Ekki er ólíklegt að viðsnúningurinn gagnvart mRNA efnunum eigi sér þær skýringar að í farvatninu eru staðreyndir úr gagnagrunni Sóttvarnastofnunar Bandaríkjanna (CDC) sem munu staðfesta skaðsemi Covid bóluefnanna með óumdeilanlegum hætti. Stjórnendur blaðsins vilja skiljanlega ekki sitja uppi með ritstjórnarstefnu um öryggi og gagnsemi bóluefna sem reynslan sýnir að valdið hafa mörgum lesendum blaðsins og fjölskyldum þeirra heilsufarslegum skaða. Bóluefnum hverra notkun verður senn bönnuð víða um heim. Bóluefnum sem væntanlega eiga drýgstan þátt í skelfilegri stöðu Íslands meðal Evrópuþjóða með hvað hæst hlutfall umframdauðsfalla ár eftir ár.

Ráðlegging sérfræðinganna í Alberta

Grein okkar Helga í Morgunblaðinu í dag:

Sérfræðingaskýrsla forsætisráðherra Alberta fylkis í Kanada um hvernig til tókst með ráðstafanir sóttvarna fylkisins á tímum Covid-19 er ítarleg og kemur til með að verða yfirvöldum víða um heim gagnleg til að forðast endurtekningu mistaka við ákvörðun sóttvarna þegar næsti faraldur gengur yfir. Hér á landi er mikilvægt að yfirvöld kynni sér skýrsluna og dragi af henni lærdóm þar sem Ísland kemur illa út í alþjóðlegum samanburði um árangur sóttvarna á tímum Covid-19. [1,2] Skýrsla OECD sýndi Ísland með annað hæsta hlutfall dauðsfalla í Evrópu í aldurshópnum 44 ára og yngri á árunum 2020 til 2022 að teknu tilliti til lýðfræðilegra þátta og að landið var með 11,5% aukningu á dánartíðni á milli áranna 2021 og 2022 á sama tíma og flest lönd sýndu fækkun dauðsfalla. Þá liggur fyrir að Ísland var með annað hæsta hlutfall umframdauðsfalla Evrópuþjóða á árinu 2022 og í efsta sæti þjóðanna með hæsta hlutfallið 2023.

Hér er einungis rúm til að nefna nokkur atriði skýrslunnar sem er 269 bls. Starfshópur sérfræðinga forsætisráðherrans í Alberta rekur í niðurstöðum að viðvörunarbjöllur hefðu átt að hringja þegar þriggja mánaða reynsla af notkun efnanna í fyrstu áfangaskýrslu Pfizer lá fyrir. Þar var greint frá 1.223 dauðsföllum sem rakin voru til bóluefnanna og að 42.086 einstaklingar hefðu skaðast af völdum efnanna innan 4 daga frá bólusetningu, þar af 45% á aldrinum 18 til 50 ára sem taldir voru í lítilli hætti af völdum Covid-19. Listi Pfizer í fyrstu áfangaskýrslunni yfir aukaverkanir af völdum mRNA Covid bóluefnisins var 9 blaðsíðna langur og greindi 1.236 sjúkdóma af völdum bóluefnisins. Gagnrýnt er í niðurstöðum starfshóps forsætisráðherrans hvernig bóluefnunum var haldið að barnshafandi en þeim hafði ekki vegnað vel í klínískum tilraunum Pfizer á bóluefninu. Einnig telja rannsakendur ámælisvert að bóluefnin hafi verið gefin börnum og unglingum sem voru í lítilli hættu af völdum sjúkdómsins.

Starfshópurinn skoðaði sérstaklega mismunandi meðferðarúrræði við Covid-19 og undir hvaða kringumstæðum hægt hefði verið að beita þeim. Sérstaklega er greint í skýrslunni hvernig heilbrigðisyfirvöld sniðgengu tiltekin lyf þrátt fyrir gagnleg áhrif til að draga úr sjúkdómseinkennum. Í skýrslunni er sérstaklega fjallað um Ivermectin en fljótlega kom í ljós að lyfið dró úr þörf fyrir innlagnir og fækkaði dauðsföllum. Hversu mörgum mannslífum hér á landi hefði mátt bjarga með notkun lyfsins verður aldrei vitað en á heimasíðu Lyfjastofnunar er umfjöllun frá mars 2021 þar sem greint er frá afstöðu Lyfjastofnunar Evrópu sem mælir gegn notkun Ivermectin til varnar og meðferðar á Covid-19. Fleiri en 100 ritrýndar rannsóknarniðurstöður vísindamanna sem eiga það sammerkt að sýna fram á gagnsemi lyfsins sem meðferð við Covid-19 og birst hafa á síðustu þremur árum hafa ekki náð að breyta viðhorfi íslenskra heilbrigðisyfirvalda til Ivermectin. [3] Hvers vegna íslensk heilbrigðisyfirvöld setja hagsmuni lyfjaframleiðenda framar heilsufari landsmanna heldur áfram að vera ráðgáta.

Niðurstöður og tillögur starfshóps sérfræðinga í Alberta í Kanada til forsætisráðherra og heilbrigðisyfirvalda eru afdráttarlausar, þeir ráðleggja tafarlausa stöðvun á notkun Covid-19 mRNA bóluefnanna þar til gengið hefur verið úr skugga um öryggi þeirra. Niðurstöður sérfræðinganna eru því hliðstæðar ráðleggingum fremstu sérfræðinga á sviði læknisfræðinnar. [4] Á Íslandi telja landlæknir og sóttvarnalæknir eldri borgurum fyrir bestu að þiggja áfram bólusetningar með Covid-19 mRNA efnunum þrátt fyrir niðurstöður fjölda rannsókna og vissu fremstu vísindamanna um skaðsemi efnanna. Vonandi ber forsætisráðherra og nýjum landlækni gæfa til að stöðva þetta langa ferli mistaka áður en frekari skaði hlýst af.

Heimildir:

1. Alberta skýrslan - https://bit.ly/alberta-skyrslan
2. Umfjöllun um skýrsluna - https://bit.ly/alberta-umfjollun
3. Ritrýndar ivermektín rannsóknir - https://c19ivm.org/
4. Ákall þúsunda lækna um tafarlausa stöðvun - https://bit.ly/stodvun-strax

Höfundar:

Þorgeir Eyjólfsson eftirlaunaþegi

Helgi Örn Viggósson hugbúnaðarsérfræðingur

Er hvítþvottur í farvatninu?

Ekki er að undra að tilefni hafi verið talið til sérstakrar íslenskrar rannsóknar á vegum Landspítalans undir heitinu „Áhrif Covid-19 bólusetningar á hjartastarfsemi með aðaláherslu á sjúkdóma í gollurhúsi, hjartavöðva eða hjartsláttartruflanir“ þegar horft er fjölgunar hjartatengdra aðgerða á spítalanum. Ígræðslum bjargráðs sem ætlað er að meðhöndla hraðar og lífshættulegar hjartsláttartruflanir hefur fjölgað um 71% á árunum 2023 og 2024 frá meðaltali áranna 2018 og 2019. Gangráðsígræðslum hefur á sama tíma fjölgað um 14%. Samkvæmt tölum Hagstofunnar hefur landsmönnum fjölgað um 10% frá 2019.

Ábyrgðarmaður rannsóknarinnar er Inga Jóna Ingimarsdóttir, hjartalæknir og sérfræðingur í hjartabilun og samverkamenn hennar eru 6 læknar og 3 læknanemar. Ekki er ljóst hverju rannsókn íslensku læknanna á að bæta í þekkingargrunninn um skaðsemi mRNA efnanna á hjartastarfsemina. Þegar eru til staðar yfir þúsund ritrýndar rannsóknargreinar um efnið. Nema vera kynni að markmiðið með íslensku rannsókninni sé að framkalla niðurstöðu sem yrði fyrrverandi landlækni og núverandi heilbrigðisráðherra þóknanleg. Það er niðurstöðu sem yrði nægilega loðin og teygjanleg til að kenna mætti veirunni sem veldur Covid-19 um skaðann á hjartastarfsemina. Það væri í anda vinnubragða landlæknis frá vorinu 2022 sem leiddu til skyndilegra starfsloka Þórólfs Guðnasonar sóttvarnalæknis þegar hann vildi ekki taka þátt í að skrá dauðsföllin af völdum mRNA bóluefnanna sem væru þau af völdum Covid-19. Það er óraunsæi að ætla að niðurstaða rannsakenda geti orðið annað en hvítþvottur fyrir heilbrigðisyfirvöld þegar horfst er í augu við þá staðreynd að þau eiga sem einstaklingar starfsframa og afkomu sína og sinna fjölskyldna undir velvilja þeirra.

Sinnuleysi umboðsmanns Alþingis

Með ólíkindum er að sjá á mynd hvernig Íslendingum sem mættu ótímabærum dauðdaga fjölgar á árinu 2022 eftir að hafa tekist að lifa af Covid árin 2020 og 2021. Faraldurinn að mestu um garð genginn og alvarlegar afleiðingar hans svo fátíðar að heilbrigðisyfirvöld töldu óhætt að aflétta opinberum sóttvarnaráðstöfunum 25. febrúar 2022. Hvernig dánartíðni áranna 2023 og 2024 er 5% hærri en á Covid árunum er mikið áhyggjuefni og ætti undir öllum eðlilegum kringumstæðum að vekja athygli bæði stjórnvalda og fjölmiðla. Hvernig má það vera að dánartíðni af stærðargráðu sem gerir Ísland að þeirri þjóð Evrópu þar sem flestir látast hlutfallslega ár eftir ár nægir ekki Umboðsmanni Alþingis til að hefja frumkvæðisathugun til að komast að ástæðum dauðsfallanna?

Hver hefði trúað fráleitustu samsæriskenningu síðustu ára?

Við athugun Department of Government Efficiency (DOGE) undir stjórn Elon Musk fyrir hönd forseta USA á fjármálum USAID (stofnun sem heldur utan um „þróunaraðstoð“ Bandaríkjanna) kom í ljós að stofnunin fjármagnaði með tugmilljónum dollara af skattfé bandarísks almennings tilraunir með SARS-CoV-2 veiruna á Wuhan Institute of Virology (WIV) í Kína. Það er eflingu veirunnar sem veldur Covid-19 og kostað hefur milljónir jarðarbúa lífið. Af þessu tilefni rifjast upp ársgamalt viðtal við Chao Shan, sem var háttsettur vísindamaður á sviði lífefnavopna við tilraunastofuna í Wuhan, þar sem fram kom að bandarískum styrkveitingum fylgdu fyrirmæli um gerð veiru sem nota mætti til fólksfækkunar. Dr. Anthony Fauci, fyrrverandi forstjóri National Institute of Allergy and Infectious Diseases (NIAID) fjármagnaði rannsóknarstofuna í Wuhan. Ljóst er hvers vegna Biden fráfarandi forseti Bandaríkjanna lét það verða eitt af sínum síðustu embættisverkum að náða Fauci „fyrirfram“ vegna lögbrota sem hann kynni að sæta ákæru og verða sakfelldur fyrir. Leita þarf hálfa öld aftur í tímann til að finna hliðstæðu náðunar Biden´s á Fauci þegar Gerald Ford forseti náðaði Richard Nixon fyrrverandi forseta vegna afbrota sem hann kynni að verða dæmdur fyrir en afsögn Nixons var tilkomin vegna innbrots pólitískra samherja forsetans á skrifstofu demókrata í Watergate byggingunni í Washington.

Bill Gates, stofnandi Microsoft og einn ríkasti maður heims, hefur verið talinn meðal slyngustu fjárfesta þegar hann fjárfesti í BioNTech framleiðanda mRNA Pfizer bóluefnisins nokkrum vikum fyrir Covid-19. Síðar seldi hann hlutabréfin með $242m hagnaði. Nú þegar fyrir liggur að tilurð veirunnar sem olli Covid var fjármögnuð af bandarísku skattfé og samkvæmt frásögn háttsetts starfsmanns rannsóknarstofunnar í Wuhan sleppt viljandi á heimsleikum hermanna sem fram fóru í Kína haustið 2019 skoðast frábær tímasetning fjárfestingar Gates í lyfjaframleiðandanum í nýju ljósi. Kröfur um rannsókn á Bill Gates, sem er meðal stærstu eigenda WHO, og Dr. Anthony Fauci stigmagnast dag frá degi og kann náðun Bidens á Fauci ekki að gagnast honum til að komast hjá fangelsisvist þegar upp verður staðið. Tugir lögmanna vinna nú baki brotnu víða um Bandaríkin við að finna veikan hlekk í náðun fyrrverandi forseta á Fauci.

Stefnir í bann við notkun mRNA bóluefnanna

Ríkjum vestra fer fjölgandi þar sem lagasetning gegn notkun mRNA efnanna er til umfjöllunar því staðreyndir um skaðsemi þeirra liggja fyrir í niðurstöðum fjölda ritrýndra rannsókna. Áskorun tugþúsunda lækna og vísindamanna um stöðvun á notkun bóluefnanna, umframdauðsföll sem rakin verða til efnanna ásamt gagnsleysi þeirra sem smitvarnar auk DNA mengunar bóluefnanna er af þingmönnum talinn sannfærandi rökstuðningur fyrir banni. Því er einungis spurning um tíma hvenær Evrópska lyfjaeftirlitið dregur neyðarheimild til notkunar efnanna til baka.

Þrátt fyrir stöðu Íslands í samanburði Evrópuþjóða með hvað hæst hlutfall umframdauðsfalla ár eftir ár verður Ísland líklega síðast landa til að hætta notkun mRNA efnanna. Þar veldur mestu skipun fyrrverandi landlæknis sem heilbrigðisráðherra auk undarlegs tómlætis þingmanna þjóðarinnar. Áhugavert verður fyrir landsmenn að fylgjast með upplýsingum á næstu dögum og vikum um miðlun fjármuna til fjölmiðla, einstaklinga, fyrirtækja og stofnana í Evrópu til að liðka fyrir notkun mRNA efnanna.