240 læknar kalla eftir fagmennsku

Þegar 240 læknar telja ástæðu til að kalla eftir fagmennsku við ráðningar á Landspítala í Læknablaðinu 2019 er ekki lengur ráðgáta hvers vegna Ísland raðast ár eftir ár meðal Evrópuþjóða með hæsta dánartíðni eða að ólifuð meðalævi Íslendinga við fæðingu samkvæmt upplýsingum Evrópsku hagstofunnar (Eurostat) hafi styst mest allra landa Evrópu frá 2019 en Hagstofan notar ólifaða meðalævi sem mælikvarða á sóttvarnaárangur á Covid árum.

Lakasti sóttvarnaárangur í Evrópu

Hvergi meðal Evrópulanda lækkuðu lífslíkur jafn mikið og á Íslandi frá árinu 2019 eða árinu fyrir Covid-19 til ársins 2024 samkvæmt frétt Eurostat. Lífslíkur, eða ólifuð meðalævi við fæðingu, lækkaði einungis í Hollandi á þessum fimm árum. Hagstofa Íslands notar breytingar á lífslíkum á Covid árunum til að meta áhrif sjúkdómsins á dánarlíkur, sbr. fréttatilkynningu frá maí 2023, og því hefur Ísland komist verst Evrópuríkja frá Covid-19. Slakur sóttvarnaárangur heilbrigðisyfirvalda endurspeglast jafnframt í stöðu landsins meðal þeirra Evrópuríkja sem hæsta dánartíðni höfðu á síðustu þremur árum.

Haustbólusetningar ekki samkvæmt faraldsfræði

Að ekki eigi eitt árið enn að halda Covid örvunarefni Pfizer að grandalausum eldri borgurum á hjúkrunarheimilum landsins í haust er mikið fagnaðarefni og markar tímamót. Þar með aukast líkur á að dánartíðni á Íslandi færist á nýjan leik nær því sem gerist í nágrannalöndunum en sem kunnugt er hefur dánartíðni á Íslandi skipað landinu undanfarin þrjú ár í hóp þeirra Evrópuþjóða sem hæsta dánartíðni hafa. Nýr landlæknir gagnrýnir örvunarbólusetningar síðustu tveggja ára að hausti og segir þær ekki hafa verið í takti við faraldsfræðina. Hann skýrir löngu tímabæra ákvörðun um að hætta örvunarbólusetningum gegn Covid að hausti í fréttatilkynningu með vísan til rangra ákvarðana fyrrverandi landlæknis og núverandi heilbrigðisráðherra.