Að horfa á snillinga látast í beinni er þyngra en tárum taki

Skaðinn af völdum bóluefnanna er augljós meðal atvinnumanna í knattspyrnu. Efra súluritið sýnir samanburð á fjölda knattspyrnumanna sem létust skyndidauða á vellinum 2019 og 2021. Það neðra fjölda leikmanna sem féllu á völlinn vegna atvika t.d. fyrir hjarta eða látnir eftir mánuðum á árinu 2021. Það leynir sér ekki að bólusetningarnar hófust vorið 2021. Í hlekknum er frásögn af fjölgun dauðsfalla atvinnumanna í knattspyrnu, fjallað um þöggunina um skaðann af efnunum hjá FIFPRO og að þrýstingi í garð leikmanna um bólusetningar var aflétt án þess að hátt færi haustið 2022.

Nýjum heilbrigðisráðherra óskað velfarnaðar í starfi

Áður hefur komið fram að áhættan (Absolute Risk) á að veikjast af covid lækkaði um 0,84% við bólusetningu. Landsmenn voru blekktir til að þiggja bóluefnið með því að telja þeim trú um 95% vernd efnanna á grundvelli útreiknings lækkunar hlutfallslegrar áhættu (relative risk reduction RRR). FDA (Lyfjaeftirlit Bandaríkjanna) varar við kynningu á smitvörn lyfja á grundvelli þess útreiknings. Samkvæmt tölum ECDC hafa 73,4% landsmanna 65 til 69 ára áttað sig á takmarkaðri skynsemi mRNA bólusetningar með því að afþakka gylliboð í auglýsingaherferð landlæknis.

Tölurnar í meðfylgjandi töflu styðja ákvörðun þorra eldri borgara. Dálkur tvö sýnir hlutfallslega smitvörn bóluefna eftir framleiðendum. Afar blekkjandi hlutfall sem haldið var að almenningi. Dálkur þrjú sýnir hvað áhætta þeirra á að veikjast af covið lækkaði í raun. Dálkur fjögur sýnir fjölda þeirra sem þarf að sprauta til að koma í veg fyrir EITT smit af Covid-19. (NNT Number Needed to Treat). Að 119 eldri borgara þurfi að bólusetja með Pfizer til að koma í veg fyrir eitt smit sýnir glögglega hversu illa ígrunduð sú ákvörðun nýja heilbrigðisráðherrans og fráfarandi landlæknis er að halda áfram bólusetningum sem enginn væri morgundagurinn þegar aukin heldur er horft til hundruða umframdauðsfalla og skaðans sem efnin hafa sannanlega valdið. Vonandi finnur nýr heilbrigðisráðherra til ábyrgðar og breytir forgangsröðuninni sem hún hafði sem landlæknir. Að nota þessi tímamót til að setja heilsu landsmanna framar hagsmunum lyfjaframleiðenda.

Verðmæti fargaðs mRNA efnis 1,9 milljarðar

Ísland er í sjötta sæti Evrópuþjóða sem kaupandi bóluefna með 442,5 skammta á hverja 100 íbúa. Af 1.648 þúsund skömmtum höfðu 889 þúsund verið notaðir í okt ´23. Þar sem þátttaka eldri borgara í örvunarbólusetningum veturinn 2023 til 2024 var dræm en þá þáðu einungis 26,6% einstaklinga á aldrinum 65 til 70 bólusetningu, 44,4% 70 til 79 ára og 46,6% 80 ára og eldri má varlega áætla verðmæti fargaðs bóluefnis 1,9 milljarða. Ítrekuðum fyrirspurnum um bóluefnakaup ríkissjóðs á grundvelli upplýsingalaga hefur ekki verið svarað.

Að förgun yfir 700 þúsund mRNA skammta er fagnaðarefni skýrist af niðurstöðum rannsókna sem sýna að eitt dauðsfall fylgir hverjum 1.000 bólusetningum. Menn geta rétt ímyndað sér ástandið á yfirfullri neyðarmóttökunni í Fossvogi ef landsmenn hefðu þegið fargaða efnið.

Til minnis

Plakatið er í innrömmun og ætlaður staður á veggnum gegnt skrifborði verðandi heilbrigðisráðherra til að auðvelda nýjum ráðherra störfin og draga úr líkum á að aðalatriðin gleymist.

Neikvæð smitvörn

Erfitt er að afneita eyðileggingarmætti Covid-19 mRNA örvunarefnanna þegar horft er á klippuna sem sýnir fjölda látinna Íslendinga á tímabilinu janúar til og með október á árunum 2020 til 2024. Ekkert lát er á umframdauðsföllum samanber stöðu Íslands meðal þjóða Evrópu með hæst hlutfall umframdauðsfalla í október. Til upprifjunar; fyrsta kóvid árið var 2020, bólusetningar hófust af krafti vorið 2021, örvunarbólusetning (þriðja sprautan) var boðin landsmönnum veturinn 21/22. Sjúkdómseinkennin voru orðin það væg þegar leið á febrúar 2022 að Embætti landlæknis ákvað að aflétta sóttvarnaráðstöfunum.

Við ákvarðanir um bólusetningar eldri borgara virðist ekki litið til þeirrar staðreyndar að mRNA efnið „hefur ekki reynst mjög gagnlegt til að hindra smit til eða frá bólusettum einstaklingi“ svo notað sé orðalag fráfarandi landlæknis. Niðurstöður ritrýndra rannsókna sem sýna neikvæða smitvörn mRNA efnanna hafa heldur ekki áhrif á ákvörðunina. En hvað er neikvæð smitvörn? Neikvæð smitvörn er þegar þeim bólusetta er hættara við að veikjast af veikinni sem bóluefnið átti að verja viðkomandi fyrir eftir því sem hann þiggur fleiri sprautur. Nýjar upplýsingar um neikvæða smitvörn efnanna koma fram í rannsókn Sóttvarnastofnunar Bandaríkjanna CDC sem sýnir að bólusettum börnum vestra er hættara við Covid eftir því sem börnin eru bólusett oftar. Hlekkur á frásagnir af rannsóknunum fjórum sem staðfesta neikvæða smitvörn mRNA efnis Pfizer.

Ísland toppar í Evrópu með 18,6% umframdauðsföll í október

Að Ísland hafi mælst með hæsta mánaðarlegt hlutfall umframdauðsfalla í Evrópu í október er ekki í fyrsta sinn og hefur landið verið í hópi Evrópuþjóða með hlutfallslega flestu dauðsföllin í mörg ár. Taflan sýnir hlutföll Íslands í samanburði við nágrannaþjóðirnar í Skandinavíu frá miðju ári.

Pfizer er mengað af saurgerils DNA og inniheldur SV40 krabbameinsvaldinn

Ekki er ólíklegt að landsmönnum sem stóð Pfizer til boða hefðu hugsað sig tvisvar um hefðu þeir vitað að efnið væri mengað af e-coli saurgerils DNA plasmíði og í því væri að finna SV40 krabbameinsvaldinn sem hafði skelfilegar afleiðingar í mænusóttar bóluefni á 6. áratug síðustu aldar. SV40 er í bóluefninu samkvæmt uppskrift framleiðandans. Ekki fyrir slysni. Ritrýndar niðurstöður nýbirtrar rannsóknar staðfesta tilvist DNA í lyfjaglösum undan mRNA Covid bóluefni Pfizer og fjölgar rannsóknunum sem staðfesta mengun bóluefnanna af DNA í margföldu heimiluðu magni. Krabbameinsvakinn SV40 er líklega hluti skýringar á miklum vexti krabbameins víða um lönd og einnig hér á Íslandi þar sem dauðsföllum af völdum illvígs krabbameins fjölgaði um 8% á árunum 2022 og 2023 frá bólusetningarárinu 2021. Nýleg rannsókn í New England Journal of Medicine tengir SV40 við krabbameinsmyndun af völdum genameðferðar lyfsins Skysona sem veldur blóðkrabbameinum hjá ríflega 10% notenda. Eftirlitsstofnanir munu senn þurfa að viðurkenna tilvist DNA mengunarinnar í bóluefnunum og taka afleiðingum leyfisákvarðana mRNA bóluefnum til handa.

Auk staðfestingar á fjórfaldri mengun Pfizer af DNA umfram heimiluð viðmið eftirlitsaðila, greinir rannsóknin flutning exósóm á gaddapróteininu til vefja og líffæra með blóðinu og inn í frumur en staðfest hefur verið að gaddapróteinið finnst í exósómum bólusettra einstaklinga. Áhugi vísindamanna á exósómum sem nýrri kynslóð örlyfjabera hefur vaxið á liðnum árum. Exósóm eru örsmáar agnir með tvöfalda lípíð himnu sem frumurnar búa til og teljast til utanfrumubóla (EVs). Helsti kostur exósóma fram yfir örlyfjabera á markaði er að exósómin eru innrænar (e. endogenous) bólur. Af því leiðir að ónæmiskerfið fjarlægir ekki exósómin úr líkamanum, þau hafa meiri stöðugleika í blóði og vefjum auk þess sem ratvísi (e. homing) þeirra að markvef eru þeim eðlislæg samkvæmt fræðunum. Þar sem rannsóknir hafa sýnt fram á tilvist gaddapróteinsins í frumum flestra vefja og líffæra kann notkun exósóma sem lyfjabera í tilviki mRNA efna Pfizer að hafa þróast með öðrum hætti en höfundar bóluefnisins ætluðu.

Bólusettir í 23% meiri hættu á bráðum hjarta- og æðaskaða samkvæmt Pfizer

Þar sem lokaskýrslu Pfizer um öryggi og reynslu af mRNA Covid-19 bóluefni framleiðandans verður skilað 20.12. n.k. er hjálplegt til samanburðar að rifja upp niðurstöður 5 áfangaskýrslunnar sem skilað var til eftirlitsaðila 24. mars s.l. og spannaði í tilviki breska 4,1 milljóna manna úrtaksins tímabilið frá upphafi bólusetninga til 21.3.2022. Skýrslan greindi áhrif efnisins á bólusetta í 12,6 milljón manna úrtaki fimm landa með tilliti til smits og áhættu á 31 sjúkdómi í samanburði við óbólusetta. Skemmst er frá að segja að skýrslan var áfellisdómur yfir bóluefninu og skal engan undra að breska lyfjaeftirlitið MHRA hafi reynt að halda henni leyndri sem lengst. Áhætta milljóna Breta sem þáðu bóluefni Pfizer á hjartameinum hækkaði umtalsvert í samanburði við þá sem afþökkuðu efnið eins og neðangreind upptalning úr skýrslu Pfizer á breska úrtakinu staðfestir:

Bráður hjarta- og æðaskaði (Acute cardiovascular injury) – 23% meiri áhætta.

Hjartsláttartruflun (Arrhythmia) – 27% meiri áhætta.

Kransæðasjúkdómur (Coronary artery disease) – 40% meiri áhætta

Hjartabólga (Myocarditis within 21 days) – 130% meiri áhætta

Smitvarnaráhrif efnisins á 4,1 milljón Breta má sjá á línuritinu til vinstri. Þegar á 8 degi varð bólusettum hættara á að veikjast af Covid. Á hægra línuritinu eru hörmuleg tíðindi úr skýrslunni en á því sést glögglega hvernig áhætta þeirra bólusettu á að greinast með bráðan hjarta- og æðaskaða fer vaxandi eftir því sem lengra líður frá bólusetningu. Heilbrigðisyfirvöld og eftirlitsaðilar bíða nú eftir lokaskýrslunni og vona að hún sýni ekki fram á fleiri alvarlegar aukaverkanir af völdum bóluefnisins en fimmta áfangaskýrslan frá í vor gerði.

Fjölfaldandi mRNA Covid-19 efni senn í boði

Beðið er samþykkis framkvæmdastjórnar Evrópusambandsins á nýrri útfærslu mRNA bóluefnanna gegn Covid-19 en European Committee for Medicinal Products for Human Use (CHMP) samþykkti jákvæða umsögn um leyfisumsókn efninu til handa 12. desember s.l..Efnið (Kostaive ARCT-154) sér um að fjölfalda sjálft sig í líkamanum og er því sem turbo útgáfa efnisins sem landsmenn þáðu 895.000 skammta af á árunum 2021 til 2023. Í klínískum rannsóknum voru 5 dauðsföll tilkynnt meðal þátttakenda. 90% bólusettra fengu aukaverkanir, 74,5% bólusettra tilkynntu kerfislægar aukaverkanir og 15,2% þurftu á læknisaðstoð að halda eftir fyrstu sprautu. Athygli vekur að margir starfsmenn lyfjaframleiðandans, Arcturus Therapeutics, eru meðal höfunda rannsóknarinnar og eykur slík nálægð ekki trúverðugleika niðurstaðna.

Einhverjum kann að þykja með ólíkindum ef framkvæmdastjórn ESB samþykkir fjölfaldandi mRNA efni sem greinilega er skaðlegt og aukin heldur engin langtímareynsla er komin á. Athygli vekur að reynslan af notkun mRNA efnanna á síðustu fjórum árum, sem endurspeglast í dauðsföllum þúsunda Evrópubúa umfram það sem gera hefði mátt ráð fyrir, að ekki sé minnst á þær þúsundir sem eiga við alvarlegan skaða af völdum bóluefnanna að etja kom ekki í veg fyrir jákvæða umsögn CHMP. Af biturri reynslu geta landsmenn ekki treyst því að stjórnendur Lyfjastofnunar og Embættis landlæknis komi til með að hafa heilsu þeirra í fyrirrúmi við ákvörðun um leyfisveitingu til notkunar efnisins hér á landi.

Bjargráðsígræðslum fjölgar um 43%

Hjartastopp verður í langflestum tilvikum vegna hjartsláttartruflana frá sleglum (neðri hjartahólfum). Ef tekst að endurlífga einstaklinga sem fara í hjartastopp er viss hætta á að atburðurinn endurtaki sig. Viðbrögð geta verið lyfjameðferð en algengara er að notuð sé ígræðsla bjargráðs. Tækinu er komið fyrir undir húð eða vöðva í brjóstholi með skurðaðgerð og leiðslur þræddar gegnum bláæðakerfið og festar við hjartavegginn ásamt rafskautum. Tækið er með tölvu sem vaktar hjartsláttinn og ákveður hvenær þörf er á rafstuði.

Senn verða fjögur ár liðin frá því að bólusetningar með mRNA efnunum gegn Covid hófust og á þeim tima hefur fjöldi ritrýndra rannsóknarniðurstaðna birst sem staðfesta skaðsemi efnanna á hjartað. Eftir Kára Stefánssyni er haft að bólusetning gegn veirunni þrefaldi líkur á bólgu í hjartavöðva. Þar sem bjargráðsígræðsla er tiltölulega dýr meðferð er henni beitt sparlega. Ekki verður annað séð en að álit Kára á auknum líkum á hjartaskaða bólusettra ásamt niðurstöðum rannsóknanna endurspeglist í tíðni bjargráðsígræðslna á Landspítalanum en þeim hefur fjölgað um 43% frá árinu 2020. (jan/nóv)